我的世界盃分組賽schedule

通常，遇上世界盃，我採取的政策是睇到幾多得幾多。
但今屆人又要返工又有show係身又年紀大左，捱到幾多場凌晨2:30呢?

應該會睇的有：
6月11日22:00 南非vs墨西哥
悶和...
6月12日19:30 韓國vs希臘
南韓真係踢得幾好!
6月12日22:00 阿根廷vs尼日利亞
美斯確實俾比利把烏鴉口邪親! 浪費唔少機會! 掛住Bartistuta呀!!
6月13日02:30 英國vs美國
龍門係好重要... 格連一個害全隊, Howard一個救全隊, Howard真係打得好呀今場! 英格蘭, 唔好次次都輸係龍門度!
6月13日19:30 阿爾及利亞vs斯洛文尼亞
一場悶波...
6月13日22:00 塞爾維亞vs加納
比之前個場好少少，但都係悶... 個手球真係唔抵輸...
6月14日02:30 德國vs澳洲
放棄唔睇，反正我唔鐘意德國
6月14日19:30 荷蘭vs丹麥
6月14日22:00 日本vs喀麥隆
睇到一半，我訓著左...
6月15日 02:30 意大利vs巴拉圭
6月15日19:30 新西蘭vs斯洛伐克
呢組確實估佢唔到，和哂波
6月15日22:00 科特迪亞vs葡萄牙
杜奧巴vsC朗
6月16日02:30 巴西vs朝鮮
結果我還是睡了一會兒，到2半起身睇佢地唱國歌再睇埋開波，睇十幾分鐘後，我捱唔住睡覺去，但其實訓落床又唔係真係幾訓到，聽到巴西嬴波才安心睡去。
6月16日22:00 西班牙vs瑞士
點都估唔到西班牙會輸，FT確實不在狀態，卡斯拿斯個下真係...
6月17日19:30 阿根廷vs南韓
終於睇返場好波!! 我都係鐘意南美足球多D!!
6月17日22:00 希臘vs尼日利亞
尼日利亞踢到咁鬼hea... 個張紅牌，其實有冇必要燥底到咁樣踢落去，其實抵希臘嬴
6月18日19:30 德國vs塞爾維亞
高路斯兩黃一紅，德國輸波，心情大好呀!
6月18日22:00 斯洛文尼亞vs美國
美國好堅持!!
6月19日02:30 英格蘭vs阿爾及利亞
證實左英格蘭係唔識入波，卡比路自己搞成隊波咁，明明應該出joe cole，林伯都踢得唔好又唔收埋佢，佢真係想將隊波搞到好似利物浦咁留力到下屆?
6月19日19:30 荷蘭vs日本
荷蘭晉級
6月19日22:00 加納vs澳洲
kewell俾人紅牌趕出場，實在唔抵，佢咁就緣盡世界盃喇...
6月20日19:30 斯洛伐克vs巴拉圭
6月20日22:00 意大利vs新西蘭
今屆第一次睇意大利，簡爺miss左係高峰退出國家隊既時機，今日一開波就犯錯俾人入左球，NZ確實踢得好，龍門勁! 最衰tommy smith同chris wood個兩球入唔到，其實佢地抵嬴架!!
6月21日02:30 巴西vs科特迪亞
又係2:30又係冇得睇... 法比安奴個球兩下手球再入波確實幾黑暗，卡卡第二張黃牌又確實唔係咁抵，但佢兩黃一紅抖一場都未嘗唔係一件好事
6月21日19:30 葡萄牙vs朝鮮
朝鮮頭廿分鐘踢得幾好架，俾人入左兩粒，下半場出返黎成隊散哂，俾人入左七粒... 頹呀
6月21日22:00 智利vs瑞士
6月22日22:00 法國vs南非
睇完甲一，趕返屋企睇下半場，見證98年冠軍上屆亞軍小組出局!! YEAH
6月23日22:00 斯洛文尼亞vs英格蘭
英格蘭... 一屆不如一屆呀
6月24日22:00 斯洛伐克vs意大利
上屆冠軍小組出局
6月25日22:00 巴西vs葡萄牙
鄧加試陣，冇kaka冇羅賓奴，組織真係弱左d
6月26日02:30 智利vs西班牙
放棄左冇睇


粗體為必睇，6月16日02:30場巴西vs朝鮮真係好想睇，但睇完訓多幾個鐘就要直踩四個show，點算好... 6月22日19:30放棄左，為左睇甲一決賽，南華vs永倫第二場，其實時間大可約我出街，有D唔係真係咁需要睇既賽事我可以放棄的，始終我都會出街約人食飯睇戲玩樂。YEAH!

updated 26/6 23:57

半日病假

結果，趁著所有老細都唔係香港，我終於請左半日病假。

病了個幾星期，沒認真抖過，照樣玩照樣工作，其實是把自己折磨成這樣。趁老細們都唔係香港，上晝send完野俾designer，終於覺得係時候要抖下，請左半日病假回家睡覺去。訓左兩粒鐘，4點去看醫生，得到假紙一張、兩樽藥水、五六包藥，太恐怖，好耐未食過咁多藥，回家後開了macbk繼續睡，訓到8點幾，好明顯真係訓完精神左，起瑪成個人冇咁病，原來病真係要休息，朋友們都叫我唔好博咁盡，畢竟不再年輕，而現在我真的發現原來真係年紀大喇，小小的流感可以折磨我咁耐。

明天繼續上班，太多野要趕，偷到半日病假都算好，其實如果唔係老細唔係香港，我應該會繼續死頂落去。要趁老細唔係香港先偷到半日假，我做到咁博其實為咩? 成件事太慘...

看足球看籃球

近來很熱衷體育活動，只限於看。

先有早前入場看港足，今晚又去了修頓看港籃甲一，還未計即將來臨的世界盃和打得火熱的nba final。

世界盃是我四年一次不可缺少的生命養份。第一次看的時候是94年，8歲，看的是決賽，巴西vs意大利，那時候有巴治奧有羅馬里奧有朗拿度，那時候我迷上森巴足球，直至現在，是唯一一樣讓我專一至今的東西。然後撇開英超意甲西甲歐聯等歐洲國家盃美洲國家盃等不同賽事，1998年，人生第二次看的世界盃，決賽又是巴西，滿懷歡喜諗住彤巴西捧盃，誰知朗拿度踢到走哂樣，俾法國捧走左，那晚我灰到發脾氣返入房上床哭著入睡。2002年，在課室弄個賭盤，每天熱烈鼓勵同學競猜邊隊嬴，最後決賽，巴西vs德國，是最後一次他和我一起看的球賽，巴西勝出的那一刻我是極度興奮，其實他也愛巴西嗎? 2006年，巴西在八強出局，又是法國，結果我又係睇完發住脾氣入睡，幸好意大利捧盃，其實我懷疑我咁憎法國係自1998年種下的怨恨。2010年，人已經由上學變成上班，看世界盃的時間肯定會減少，還是想堅持有得睇就盡睇，巴西依然是我熱捧的那一隊，但今年點都唔覺佢會捧盃，雖則我還是想佢成為唯一一隊可以跨洲捧盃的球隊。

nba是小學時開始看，那時是michael jordan的天下，很自然地，我愛看michael jordan，看芝加哥公牛，便會討厭猶他爵士，也討厭馬龍。猶幸那幾年芝加哥公牛毫無懸念地拿下總冠軍。michael jordan退休後，我愛看allen iverson，愛費城七十六人，那陣子也是七十六人最火熱的時候，所以你會發現我的某些東西是連著76，曾有人誤會我是喜愛76這個牌子，其實只是因為那時我太愛七十六人，但自七十六人嬴不了總冠軍，allen iverson狀態開始下滑後，我便少看了nba，勒邦占士的年代我已經極少看nba，直至近排無啦啦又迷上看體育活動，自然地，我又看回nba final。沒捧什麼球隊的情況下，還是很肉緊地看了。

當然，我還熱愛奧運，任何一種體活動我都可以看上一整天。
但我卻未遇上一個人和我一樣那麼熱愛看體育活動，特別是另一半。

跌左把聲係紅館

本來計劃好一堆美好又豐富的節目塞爆weekend，結果因為一場突如其來的病將那美好的週末粉碎了。

發病原因不詳，總之就係傷風喉嚨痛兼發燒，然後我發現近半年來每次我病都必定請唔到病假，因為都係最忙最多野趕的時候，結果死撐到最後，更甚的是今次發住燒返工仲要冇假放，原來，我的意志力很強。

27號晚的arthk10，開始發病的一晚，人很多，對我而言，arthk09好看很多，共產主義仍然是熱門題材，其實我真係有D迷戀那個紅色年代的arts style。

28號坐了booth一整天，是致病原因，坐完booth就去hope&glory，對，我又去hope&glory，一個月之內第四次，其實唔知去咁多次為咩，當然有一半是聽forum，但其實每次入到去都覺得係一個逃避的好地方。明知自己開始病還是喝了酒，最後放棄去music matters live，又再喝了酒，這算是慢性自殺，而我縱容著自己...

29號戴著口罩上班，教完班有兩小時的空檔去找auntie jane吃個tea，喝了杯咖啡，然後回去工作，rehearsal不斷地彈琴，頂著燒還是死撐下去，最黑仔是無啦啦落雨卻沒帶傘，也許放工遇到的那場雨，讓病情加重吧。這晚，我放棄了ian curtis-you are no good for me。

30號早上起床，吃了藥睡了一晚，退了燒但把聲完全爛哂，但還是要工作，繼續坐booth坐一整天，一整天的時間，我看完了1Q84 book 1，波仔6還有1/3。

31號把聲已經爛了，工作著，沒怎麼說話，為晚上看五月天準備，已經準備將把聲豁出去，帶住把爛聲去看，企足唱足全場，結果，我把聲跌左係紅館搵唔返。尾場氣氛實在太好，五月天對我而言，是青春的一部份，基本上首首歌都識唱，尤其見到好多fds都有去睇，就知五月天對80後影響有幾深啦。雖然睇到把聲更加爛，但成場show好值得我犧牲自己把聲，但我都完全感受到陳eason當初帶住把爛聲捱咁多場演唱會係有幾咁辛苦。