酒店本身冇餐廳，所以要拎住早餐卷去對面街既一間cafe食。
間cafe都好大，好似有三層，都好多人出出入入黎幫襯，當然有一半係遊客，附近有幾間酒店既早餐都係黎呢度食，台灣人多數都係外賣。
大概我地有8-9款早餐可以揀，都係sandwich多士之類，我地第一日叫左hotdog同照燒雞sandwich，飲latte同cappuccino，個hotdog好好食，佢焗左個麵包，好香口，照燒雞就冇咩特別喇，所以決定聽日encore hotdog，再試另一個sandwich。
食完野都係八點幾，所以諗住行下，睇下周圍有d咩先起行去九份，行下行下我地見到tvbs既攝製隊，再行前d就係特偵組! 唔知個日係咪有審訊呢?!
係特偵組對面就係台灣博物館，只係門口影左幾張相，之後就發現原來隔離就係二二八和平公園，既然咁近就行過去睇埋二二八個紀念塔啦。
本來諗住返酒店，講起總統府應該都係附近，講下講下就見到佢個頂，所以就行埋過去影下相，結果遲左成個鐘先出發去九份。
買左台鐵飛又未夠鐘就去左行台鐵本鋪，喪係度玩印仔，之後就落左去月台等車。
坐下又訓下，睇住d站名真係好鬼得意，七渚八渚暖暖，唔駛一個鐘就到左瑞芳啦，好多人落車，有d去九份，有d去坐平溪小火車，有d就去金瓜石。
出左站就去搵巴士站，見到一條人龍，好彩上到車都仲有位坐，好快就到九份，落車個陣大家都見唔到間711，都係度諗緊究竟係咪呢站落，笑死我。
一入到去基山街就聞到臭豆腐味，NT25一串，好抵食！
沿住路一路行，行到豎崎路就行上去九份國小度食芋圓。
超好食，望住山景係度食，d芋圓好彈牙!!!! 好夠味又大粒! 食完就又再閒逛，去左基山街街尾個度影相，其實再行過d影返去仲靚。
三點幾就係九份離開，返去台北lu，本來想等架車直接去忠孝復興，但去瑞芳架車黎先，咁就再搭台鐵啦。
No comments:
Post a Comment