short trip。taipei 1.1

四日三夜，台北，天氣真係不似預期，一落機就15度，仲要落下雨，凍到我死，之後個兩日，天氣預報明明都係陰天，好彩有陽光，day 3仲好到變返廿幾度，尋日返黎個陣，台北又陰陰地天，我諗應該又會落雨架喇。

當日5點半係屋企出門口，落街等左陣就有機場巴士，去到機場都六點半，就去自助check in，無哂窗口位，只好坐中間啦，不過反正香港都黑天落雨，坐窗口都冇野睇啦，上左機後無啦啦落雨，遲左5分鐘度先起飛，d氣流勁到好似玩過山車咁，當時好憎港龍坐位個mon，我真係唔想知自己架機由幾多高度跌到幾多呀，好恐怖。飛出香港後就好穩定喇，食完早餐仲有陳慧琳演唱會睇，落機拎完行李，岩岩好有國光就跳左上車去台北車站lu。
行去站前地下街，搵到出口出返地面，行多幾步就到酒店，其實好近。

酒店3點先有房，放低行李就出發去故宮博物院。
搭捷運去到士林再轉公車，開始落雨，好寒，5-10分鐘度就去到故宮門口。

故宮三面環山，又落雨又有霧都好好feel。

入面展覽唔俾影相，去左睇翠玉白菜，條蟲個觸鬚真係斷左！睇埋肉石，遙不可及既宋代定窯汝窯，我最鐘意既雕橄欖核舟，快雪時晴帖個d應該無緣睇到架喇，另，cctv拍既故宮博物院特輯真係好值得睇，睇完黎到完全想像唔到當時點將呢堆文物由北京輾轉經過大半個中國再運黎台灣，黎故宮博物院如果唔夠時間行哂都一定要去睇宋汝窯，全世界得返　65件，台北故宮就有21件，北京都只係得17件。

北宋 汝窯　蓮花式溫碗和北宋 汝窯　青瓷無紋水仙盆

行完故宮，就去左至善園，憑故宮當日門票免費入場。
普通一個公園仔，仿宋明庭園而建，冇咩特別。