凌晨欣賞完巴西世界盃前的熱身賽，最後大勝4比0，大哨明顯地未回復最佳狀態，KAKA依然勁，阿祖安奴都差不多返哂黎，但依然有點擔心巴西。
剛看到trazy勝家中的黃興佳金句，笑死左，黃興佳是有線espn足球評述員，有人說他折磨香港球迷耳朵多年，無啦啦諗起呀yuk既我有耳仔，有人說看完他的金句後保證會話「點解講咁多廢話，仲有得逗人工繼續講?」喎
節錄：
01. 領先一"凹" （明明係"粒"，係要讀成"凹")
02. 波係圓，係用來踢既 (鬼唔知係用黎踢)
03. o係今場波邊隊能夠入一"粒"先，果隊就會有優勢 (係喎，唔講都唔知囉)
04. 睇波呢家野，睇得波多咪睇到多d好波囉 (呢個世界有樣野叫精華)
08. 呢個罰波係o係右路偏左既位置 (不如講埋係北緯東京偏東幾多度呀)
09. 每隊波都要有個好既死球專家 <-----經典...
11. 所以話，現代既足球每隊波一定要有一個罰波專家
12. 現代既足球，係將皮球送入網窩裡面既（難道以前唔係？）
13. 現代足球講求有實力，有速度
14. 現代足球最緊要攻守兼備
15. 呢球波拉得咁行，唔係用腳背，係用腳既肉心呀 (嘩，即係邊度呀)
18. 當一隊波進攻既時候，另一隊就需要去防守
19. 十二碼呢家野呢，有兩個可能性，一係入，一係唔入
20. 呢球波一係入，一係龍門救到，一係出界
21. 呢球波，如果冇龍門就入喇
22. 呢球波射得恰到好處，唔太高，唔太矮，唔太勁又唔太遠，總之就入啦
23. 一個好既守門員可以令到場波由輸變和，由和變嬴
24. 哈哈，龍門最好既朋友係邊個呀？咪係龍門柱囉
27. 幾時都話，後防好緊要，紐卡素就差係呢度〔利記對紐卡素重覆了大約十次〕
28. 防守球員犯左腦筋上既錯誤
29. 拿…做防守球員最緊要係咩呀？咪"安全第一囉"
30. 條防線包得無深度，裝越位失敗，咁咪失波咯
33. 識轉身既前鋒好值錢 (識得入波既前鋒先值$，淨係識轉身係冇用)
41. 波唔使講架，球迷自己識睇 (咁你又講?!)
42. 呢場比賽我只可以用"一個字"黎形容---精采 (擺明兩個字，不如轉做英文excellent呀)
43. 嘩！睇呢場波就興奮過食興奮劑
52. 西班牙球會奧沙辛拿(Osasuna)=「奧沙桑拿」
53. 新特"能" (新特蘭)
54. D 利物浦球迷唱緊佢地既會歌--你永遠唔會一個人行路 (翻譯能力真係好．．)
56. 呢球波係咪真係紅軍既利物浦出界架？好似擦到藍軍球員既波襪架喎 (嘩，睇得好仔細呀)
57. 愛華頓呢隊波蔗渣o既價錢，但係踢出燒鵝o既味道
58. 巴路士，淨係識得一味去，冇諗過交俾身邊既隊友
59. 利物浦的巴路士同列斯的巴基.....兩個都係姓巴........ （英文名呀大佬）
61. 保方保方，保住後方 (怪不得係意大利國家隊咁重要)
62. 保定保定，保住就定
63. 梅度梅度，梅開二度，跟住加多句"林伯特差Ｄ入多球，變埋梅度"
64. 近排加利仔狀態唔夠fit呀-第一佢跑得慢！第二佢唔夠快！！第三無速度！！！(用左3個唔同既形容詞，中文真係好)
65. 呢球波史高斯好有機會入波，但係無機會起腳
66. 希斯基，力的表現!
69. "O"雲仔一心自己去，一定架啦......英倫三島的前鋒係唔會交波架......
70. 呢球波碧咸傳得好靚架，不過前面羅唔到咋嘛
71. (亨利)12碼都唔入，30碼又點會入呀 (咁多句，呢句講得最岩!!!!)
72. 柏金呢隻老馬就好似星期三晚夜馬隻駿先鋒咁，追極都追唔到呀！
74. 哈素賓基個名咁長，個 Shoulder 冇返咁橫都印唔晒個名
77. 佢既全名係冼拿馬?邦高利，如果是旦叫冼拿馬或者邦高利就係唔岩既，你有無人叫歐陽做阿歐架？歐陽就歐陽，司徒就司徒架嘛，佢就係咁樣樣喇，冼拿馬邦高利冼拿馬?邦高利，如果我今晚叫到你全名6次，我就請你食宵夜 (已經講左4次)
79. 呢場波可能係英倫三島兩個最佳左後衛既對決 --- (阿仙奴 vs列斯--艾殊利高爾 vs 夏迪) (但兩個球員都打自己的「左路」，怎會相遇)
80. 做唔成英雄，就做罪魁
84. 唔會俾牌，英倫三島既球證唔會咁易俾牌.......真係比喎.....球證太過嚴
86. 今日藍色波襪踢得好過白色波襪
90. 列斯領先2:1︰領先緊一球就梗係同你死守,守住個勝果;紐卡素扳平2:2︰拿,呢個就係打死守既後果
91. 阿仙奴開波幾分鐘就入波，好打好多。（被追和後）我都話，太早入波未必好架......因為有大把時間比人追丫嘛
96. 入到禁區就係皇帝
99. 奧尼爾（樸茨茅夫球員）開心到跳起，跳得高過NBA果個奧尼爾
100. .(淨番10分鐘完場，紐卡素仲輸緊一球)所以話舒利亞咁大年紀，叫佢場場打正選，點會有表現呢．．．（轉個頭，舒利亞離門三十碼射個窩利世界波入網）所以話舒利亞呢個球員，真係爛船都有三斤釘呀！
呀叔係呢個圈咁重要係有道理既。
起碼呀叔有為全港改左大哨同細哨呢兩個咁有代表性既名。
No comments:
Post a Comment